राष्ट्र बैंक पेन्सन कोष लगानी : ७ अर्ब ३० करोड मुद्दती निक्षेपमा राखिने
काठमाडौँ । राष्ट्र बैंक पेन्सन कोष लगानी अन्तर्गत नेपाल राष्ट्र बैंकले ७ अर्ब ३० करोड रुपैयाँ मुद्दती निक्षेपमा लगानी गर्ने भएको छ। यसका लागि केन्द्रीय बैंकले प्रस्ताव आह्वान गरेको छ।
प्रस्ताव पेश गर्ने संस्थाहरू कम्तीमा दुई वर्षदेखि सञ्चालनमा रहेको हुनुपर्नेछ। ती संस्थाले नियामकले तोकेको न्यूनतम कुल पुँजीकोष कायम गरेको हुनुपर्नेछ।
राष्ट्र बैंकका अनुसार निष्क्रिय कर्जा (एनपीएल) कुल कर्जाको ८ प्रतिशतभन्दा कम हुनुपर्नेछ। खुद निष्क्रिय कर्जा अनुपात ३ प्रतिशतभित्र कायम भएको हुनुपर्नेछ।
त्यस्तै, खुद तरल सम्पत्ति अनुपात पनि तोकिएको सीमाभित्र हुनुपर्नेछ। कर्जा–निक्षेप अनुपात पनि सीमाभित्र हुनुपर्नेछ।
पछिल्लो आर्थिक वर्षमा खुद नाफामा रहेका संस्थाले मात्रै आवेदन दिन पाउनेछन्। शीघ्र सुधारात्मक कारबाहीमा परेका संस्था सहभागी हुन पाउने छैनन्।
यदि त्यस्तो कारबाहीमा परेको भए कम्तीमा ६ महिनाअघि फुकुवा भएको हुनुपर्नेछ।
राष्ट्र बैंकले सर्वसाधारणका लागि शेयर निष्काशन गरिसकेका संस्थालाई मात्र सहभागी गराउनेछ।
प्रस्तावमा उल्लेख गरिएको ब्याजदर लगानी अवधिभर स्थिर रहनेछ। यो व्यवस्था राष्ट्र बैंकले जनाएको छ।
योग्य संस्थामध्ये सबैभन्दा बढी ब्याजदर प्रस्ताव गर्ने संस्थामा रकम लगानी गरिनेछ। समान ब्याजदर प्रस्ताव भएमा नीतिअनुसार छनोट गरिनेछ।
यो रकम मुद्दती निक्षेपका रूपमा राखिनेछ। संस्थाले त्रैमासिक रूपमा ब्याज भुक्तानी गर्नुपर्नेछ।
साँवा तथा ब्याज समयमा नतिरे अतिरिक्त पेनाल ब्याज लाग्नेछ।
राष्ट्र बैंकले वाणिज्य बैंकका लागि ५ अर्ब ८४ करोड रुपैयाँ छुट्याएको छ। विकास बैंकका लागि १ अर्ब ९ करोड ५० लाख रुपैयाँ विनियोजन गरिएको छ। वित्त कम्पनीका लागि ३६ करोड ५० लाख रुपैयाँ छुट्याइएको छ।
प्रतिक्रिया